Vi ønsker alle hjertlig velkommen til Kulturkveld fredag 2. mars kl. 19.30 på Lågdalsmuseet. Kveldens første avdeling er møte med spelemennene Knut Anders Buen - Daniel Sandèn Warg. Andre avdeling er vår dansefest ca. kl. 20.30.

Kiosken holder sulten stangen uten at vi ''lopper'' deg for penger.

Per Anders Buen Garnås, www.peranders.no

Læremeistrar
Per Anders Buen Garnås er fødd i 1980 og oppvakse i Bø i Telemark. Som 6-åring byrja han å spela hardingfele, inspirert av to onklar, Hauk og Knut Buen, som heile tida har vore føredøme og læremeistrar for honom. Etterkvart blei han kjend med dei beste levende spelemenn i heimfylket, og fekk lære av dei alle - slike som Einar Løndal, Eivind Mo, Anund Roheim, Bjarne Herrefoss, Olav K. Øyaland og Gunnar Innleggen. Mykje lærerikt samvær med meisterspelemannen Hallvard T. Bjørgum, har også vore veldig inspirerande for honom.

Prisar og kappleikar
I 1998 vart han tildelt "Øivind Bergs minnepris" under Peer Gynt stemnet på Vinstra. Og han har elles fenge prisar i heimbygda Bø for sin representasjon. Per Andres Buen Garnås spela seg som 19 åring opp i A-klassa på hardingfele på Landskappleiken i 1999. Bak seg hadde han da mange 1. premiar og sigrar frå større og mindre kappleikar rundt om i landet, m.a. vann han juniorklassa på hardingfele tre år på rad i '94, '95 og '96. I 1999, 2000, 2001 og 2005 blei han kåra til "Årets Fanitull" under Folkemusikkveka på Ål, og har såleis vunne Olav Thons vandrepokal 4 gonger. I 2002 blei han tildela Telemarkstipendet for "framifrå kulturinnsats tufta på tradisjonar, men med ope sinn for nyskaping og kulturell brubygging". I 2003 spela han seg opp i finalen på Landskappleiken på Gjøvik og vann, og blei slik Noregsmeister. I 2006 vann han Postens festivalspel, for beste dansespel under Telemarksfestivalen, samt Ingebjørg K. Bøs minnepris, som beste deltakar uansett klasse på Setesdalskappleiken.

Utdanning og erfaring
I 2000 avslutta han studiar på Spelemannsskulen ved Ole Bull Akademiet, etter to år med formell fordjuping i slåttemusikk. Etter dette har Per Anders Buen Garnås levd av felespel på heiltid, og forutan om å ha spela i mange ulike samanhengar her i landet, har han også formidla musikken sin i andre land opp i gjennom åra; t.d. Sverige, Danmark, Finland, Estland, Latvia, Russland, Østerrike, USA og Bangladesh. Sjølv om Per Anders har veldig stor elsk til og fokus på den tradisjonelle slåttemusikken, har han også opptrådt i meir eksperimentelle samanhengar, både saman med andre folkemusikarar, men også med folk med bakgrunn i jazz, gammaldans, kyrkjemusikk, klassisk og hip-hop. M.a. var han i 2001 på rikskonsertturné med hiphop og jazzmusikarane MJ og Alis frå Oslo Fluid og Klovner i Kamp. Med desse hiphoparane var han på turné i Rikskonsertane i 2001. Per Anders har også komponera ein del nye slåttar for solo hardingfele, og nokon av desse har allereie gått inn som ein del av repertoaret til andre spelemenn i landet.

Diskografi
I 2002 kom han ut med sin fyrste CD, "Åleine" (NYCD2), som hausta mykje fagnad. Denne plata fekk terningkast 5 i VG, og blei samtidig den fyrste reine folkemusikkplata som blei anmeldt i landets største avis. "Åleine" blei nominert til Spelemannsprisen. Han har elles m.a. medverka som arrangør på den mykje omtala CDen til mor, Agnes Buen Garnås, "Han rider den mørke natt" (Via Music), der han saman med medmusikantane også hausta veldig gode kritikkar for musikken sin. I tillegg er han med som medmusikant på NYCD4 "På Grønalihei", og også på suksessalbumet "Luring" med Odd Nordstoga.

Daniel Sanden Warg

Læremeistrar
Daniel Sandén Warg er fødd i 1977 i Karlstad i Sverige. Daniel har ei ganske unik og spesiell historie bak sin hardingfelekarriere. Som 12-åring bladde han i mor si platesamling, og fall her pladask for Jimi Hendrix sitt album "Are you experienced?" Han kjøpte seg elgitar og fordjupa seg aldeles i dette materialet. Etterkvart øvde han seg opp til å bli ei lita barnestjerne med denne musikken. Men i 8. klasse byrja Magnus Stinnerbom i klassa hans. Gjennon honom blei han etterkvart introdusera for den nordiske folkemusikken. Far til Magnus, teaterregissør og spelemann, Leif Stinnerbom, tok jamleg fram fela og spela for dei. Slik fekk Daniel meir og meir sansen for denne musikken, og oppdaga ektheita i måten å spela på. Til slutt selte han gitar og forsterkar, for å kjøpe seg fele. Han høyrde på folkemusikkband som Hedningarna, Väsen, Frifot og Groupa, og fyrstnemnde var det som fyrst introdusera han for Setesdalsmusikken. Daniel blei nyfiken på denne musikken, og skaffa seg raskt innspelingar med Hallvard T. og Torleiv H. Bjørgum. Like raskt kjøpte han seg hardingfele. Etter ei tid sende han opptak med seg sjølv til Hallvard T. Bjørgum, guruen i Setesdalspelet i dag, i von om å få koma og lære. Det fekk han med ein gong. Han blei raskt like god på denne norske musikken, som han var på den svenske folkemusikken - noko ingen andre har greidd føre honom. Sidan har Daniel blive den store arvtakaren av spelet etter Knut J. Heddi i Hylestad i Setesdal - både ved å lære direkte av Hallvard T. Bjørgum, men også gjennom å studere gamle opptak med Torleiv H. Bjørgum og Andres K. Rysstad. Daniel flytte til Rysstad i Setesdal i 1998, og har budd der sidan - eine og aleine for å leva på den staden der musikken han elskar så høgt eksisterer. Nå er han utdanna sølvsmed, samtidig som han er ein særs aktiv musikar i mange samanhengar.

Prisar og kappleikar
Daniel har ikkje vore så aktiv kappleiksdeltakar som dei fleste norske spelemenn er og har vore. I Sverige er ikkje kappleiksmentaliteten så gjeldande, men han har likevel vore nok med til at han har greidd å spela seg opp blant eliten i Noreg. I 2002 spela han seg opp i A-klassa på Landskappleiken i Vågåmo, men har ikkje delteke her etterpå. Heime i Sverige har han motteke ei rekke nasjonale prisar for musikken sin - m.a. Päkkos Gustavs hederspris, Lions kulturpris og Gevalias kulturpris. I 2004 fekk han også stipend frå Konstnärnämden i Sverige. I Setesdal veit dei også å setja pris på den nye spelemannen sin; Valle kommune har gjeve honom heile 3 kunstnarstipend etter han kom til dalen.

Utdanning og erfaring
Daniel gjekk fyrst tre år ved Sunnstad musikkgymnas i Sverige, for deretter å spela på heiltid, fram til han tok til med sylvsmedutdanninga i Setesdal. Han har brei erfaring som musikar - både som solist og som medmusikant. Etter ferdig utdanning ved musikkgymnaset, tok han til som teatermusikar i teateret til Leif Stinnerbom. Dette var i Vestanå i Sverige. Her var han med på oppvisningar som ""Hamlet", "Østanom sol", "Celestina", "Mellan himmel och jord" og "Nils Holgerson". Seinare, da Leif Stinnerbom sette opp den kritikarroste "Peer Gynt" i Stavanger, var nok ein gong Daniel fast musikar i eit halvt år. Alle desse forestillingane var regissert med inspirasjon frå den nordiske folkemusikken og dansen.

Han og Magnus Stinnerbom danna tidleg gruppa "Harv", som har hatt stor suksess med den svenske folkemusikken. Det byrja som ein duo, men har utvikla seg til eit fullt band, med to feler, trommer, gitar og bass. Desse har spela, forutanom i Sverige og Noreg, m.a. både i Tyskland, Estland, Latvia, USA, Canada, Guatemala og India. Når Rikskonsertane sette opp suksessen "Tryllefløyten" i folkemusikalsk versjon i 2005, var det Harv som blei nytta som musikarar. Daniel blir i det heile mykje nytta både som solist og medmusikant, både i Noreg og i Sverige. Sidan hausten 2004 har han m.a. vore fast medlem av Odd Nordstogas band på tallause konsertar og turnéar etter suksessen med albumet "Luring".

Diskografi
Daniel si svenske gruppe, Harv, kom ut med sin fyrste cd i 1997; "Harv". Seinare har denne gruppa kome ut med både "Must", "Töst" og "Polka raggioso". I samband med teaterframsyninga "Nils Holgerson" deltek han også på CDen "Holger". I Noreg har han også vore delaktig på ein del CDar. På Hallvard T. Bjørgum sin eksperimentelle produksjon "Free field" er Daniel medmusikant, og blei slik nominera til Spelemannsprisen i 2004. Saman med Spelemannslaget Knut Heddis minne gav han i 2003 ut albumet "Lea' deg!" Han er også med å spelar på Odd Nordstoga sin kassasuksess "Luring" frå 2004, saman med Per Anders Buen Garnås. Sumaren 2006 spela han inn slåttar på hardingfele for Etnisk Musikklubb, saman med Sigurd Brokke på munnharpe, til ei utgjeving som er rett rundt hjørnet hausten 2006. Vidare er han med på Odd Nordstogas nye CD, som kom ut ved same tider. Han har óg vore fast spelemann i Odds band dette året.

Et spennende samarbeidsprosjekt

Per Anders og Daniel møttest fyrste gong på eit spelemannsstemne i Ransäther i Sverige sumaren 1996, og har sidan vore gode kameratar med respekt for kvarandre som spelemenn. Idéen om å gjeve ut ein CD i hop kom tidleg opp. Båe to har dei siste åra vore opptekne på kvar sine kantar med ulike prosjekt, men dei to er endeleg blive einige om at tida nå er mogen for å koma i gang med dette prosjektet.

Desse to representerer kvar for seg to ulike tradisjonar, med to ulike uttrykk innan hardingfeletradisjonen - Setesdalsspelet og Telemarksspelet. Setesdal har dei suggereande gangarane, som av og til blir karakterisert som folkemusikkens rock'n'roll. Telemark har dei lyriske, ettertenksame gangarane, samt springarane med all slags uttrykk. Dette i seg sjølv gjev eit godt utgangspunkt for variasjon på produksjonen. Samtidig er desse to utøvarane utruleg samstemte når det gjeld måten å tenkje musikk på, og møtast difor veldig godt som utøvarar. Til dømes er dei av dei få unge utøvarane som har arbeidd med å halde oppe noko av det sjeldne i slåttemusikken i dag; Nemleg å bevare den skeive , eller "blåe" tonaliteten som høyrer heime i nokon av tradisjonane i desse to distrikta, der mikrotonar utanom den tempererte skalaen er avgjerande.

Daniel er eksponent for den "låge" tonaliteten etter Andres K. Rysstad frå Hylestad. Per Anders har mellom anna arbeidd mykje med den "høge" etter Johannes K. Dahle og Olav Øyland i Tinn, men også m.a. med den "låge" etter Borgjakarane i Bø, og Eilev Smedal i Seljord.

Tonaliteten varierar mellom dei ulike tradisjonane, og også frå slått til slått innan ein tradisjon, og Daniel og Per Anders er begge opptekne av å bruke dette verkemiddelet for å la kvar slått få sitt rette uttrykk, og slik treffe dei rette understrengene hjå tilhøyraren. Likevel har dei båe arbeidd med fleire tonale sider av tradisjonane, også dei meir temperera - noko dei sjølvsagt også likar å utøve.

Sjølv om båe spelemennene er veldig opptekne av det tradisjonelle i slåttemusikken, og står med kvart sitt beint støtt planta i denne, går ingen av dei av vegen for nyskaping. Slik er det også naturleg at dei to møtest i tostemt hardingfelespel når dei vil gjeva ut noko saman. Difor ønskjer dei å smette inn nokre kutt med slåttar arrangerte for to hardingfele, som små avbrekk mellom lengre bolkar med tradisjonelt solospel. I dette samspelet vil dei nytte slåttar i andre rytmar enn springar og gangar, dvs tradisjonelle runddansslåttar i frå desse to distrikta - noko som sjeldan og aldri har blive gjeve ut på CD tidlegare. Dette er materiale som få veit om, og som Daniel og Per Anders meiner fortener å kome ut i dagens lys. Desse gammaldansslåttane er heilt utypiske når det gjeld oppbygging og tonalitet i forhold til den standardgammaldansen ein er van med å høyre - og dei er som skapt for samspel mellom desse to.

Eit døme på ein slik slått er reinlendaren "Du og Jeg og Vi to" etter Andres K. Rysstad, som framstår som ein skakk og snodig variant av den kjende melodien - og som også har gjeve arbeidstittel til prosjektet. I dette samspelet vil dei båe dra nytte av samspelerfaringa deira. Daniel kan også syne oss kva svenskane kan som få kan her i landet - da dei har mykje lenger og meir utvikla tradisjon for 2. stemmer og "skuggelegging" av slåttar, enn kva nordmennene har.

Begge spelemennene er av dei som likar å variere med ulike felestiller og tonehøgder. Variasjon i rytme, uttrykk, durar og tonalitet er stikkorda for kva utøvarane ønskjer å presentere - og med dette syne mangfaldet i musikken vår. Slik vil dei truleg skape ein heilskap som ikkje vil verke keisam på ein lyttar som ikkje er større kjend med musikken, men likevel vere interessant for den vanlege tilhøyrar.

Plateselskapet Ta:lik har sagt seg viljuge til å gjeve ut produksjonen. Det er også snakk om å lage ein musikkvideo til prosjektet.

Kongsberg Spel og Dansarlag ønsker alle hjertelig velkommen !